Мота го утврди главниот проблем на неговиот Јувентус по драматичниот пораз од Милан

Јувентус цели 70 минути изгледаше како тим кој ги контролира нештата во Ријад со предност од 1:0, но првиот удар кој го зададе Милан делуваше фатално врз играта на тимот кој го води Тиаго Мота, па во краток временски интервал видовме пресврт на „росонерите“.

Сержо Консеисао дебитираше со пресврт победа во големото дерби во полуфиналето на италијанскиот Суперкуп, па ако Португалецот откри дека на полувреме им одржал лекција на своите фудбалери поради лошото издание во воведните 45 минути, неговиот колега го утврди најголемиот проблем на Јувентус во последно време.

Јуве по којзнае кој пат оваа сезона испушти предност и не приврши натпревар на кој изгледаше дека ги контролира нештата, а тоа му даде за право на Мота да заклучи дека на неговиот тим му недостасува карактер.

– Не можеме и не смееме да бидеме задоволни од тоа што го направивме. Во првото полувреме бевме лоши, но во второто пропуштивме шанса да го убиеме мечот. Милан направи многу малку и не требаше да победи со оглед на тоа што го прикажа во полуфиналето.

– Ова е тежок удар за нас, навистина непријатен пораз. Имавме голема шанса да играме во финалето и навистина е разочарувачки што пропуштивме огромна шанса да го победиме Милан. Мора да го поправиме нашиот карактер, сметам дека на овој тим му недостасува карактер. Контролиравме цели 70 минути, пропуштивме да го решиме мечот, а карактерот доаѓа до израз по првиот негативен инцидент на теренот. Треба да реагирате по првиот лош момент, а ние после првиот примен гол ја уништивме цела работа која ја правевме дотогаш, – изјави Мота.