Мората: Тој е еден од најпотценетите играчи во последните 25 години

Започнува новата сезона во Лигата на шампионите, односно денеска се играат мечевите од Е, Ф, Г и Х групата, а еден од нив е оној меѓу Лацио и Атлетико Мадрид.

Се очекува ова да биде една израмнета битка на два состави кои немаа добра најава за пресметката на „Олимпико“ со оглед на тоа што лацијалите беа матирани од Јувентус, додека „душекџиите“ претрпеа неочекуван убедлив пораз од Валенсија од 3-0.

Еден од главните адути на гостите ќе биде Алваро Мората кој се надева на квалитетно издание, вистински одговор по катастрофата на „Месталја“.

-Секое натпреварување е важно. Имаме голема доверба во групата. Ќе направам се за да освојувам титули со Атлетико, како и моите соиграчи. Ќе има многу натпреварувања со кои треба да се соочиме, Лигата на шампионите, Ла Лига, Купот на Кралот и Суперкупот, без разлика на тоа што се случи во Валенсија, -рече напаѓачот кој даде голем комплимент за асото на калчолигашот, Луис Алберто.

-Го познавам од 12-13 години. Тој ми се чини еден од најпотценетите играчи во Шпанија во последните 25 години. Тој е технички поткован, има карактер, мислам дека е многу силен, -заклучи Алваро.