Моќното трио на Лејкерс искомбинира 85 поени за важна победа над Мемфис (Видео)

Лос Анџелес Лејкерс утринава му гостуваше на Мемфис во директен дуел за четвртото место во западната конференција и успеа да го искористи ефектот на расположеното ударно трио за важна победа (127:134).

Во натпревар со многу поени, ЛеБрон Џејмс, Остин Ривс и Лука Дончиќ реализираа 85 поени, а најефикасен беше Ривс со 31, по што следуваа Дончиќ со 29 и Џејмс со 25 поени.

Натпреварот дојде по шокантниот финиш во Чикаго, каде Лејкерс загубија со тројката со звукот на сирената на Гиди, но носи предност од една победа во однос на Гризлис и барем теоретски шанси да се брка Денвер кој е на третото место на Западот.

Бејн со 29 поени беше најефикасен кај домаќините, кои останаа без долгогодишниот тренер Тејлор Џенкинс во пресрет на оваа дерби средба.

Далас му ја прекина серијата од четири победи по ред на Чикаго, додека сигурни победи остварија Бостон и Оклахома Сити.

Вашингтон – Бруклин 112:115
Филаделфија – Мајами 95:118
Чикаго – Далас 119:120
Мемфис – Л.А Лејкерс 127:134
Оклахома сити – Индијана 132:111
Сан Антонио – Бостон 111:121