Моќниот Ливерпул го надигра Сити и ја продолжи агонијата на Гвардиола (Видео)

Ливерпул во период од неколку дена ги победи двата најдобри тимови во Европа во последните неколку години, бидејќи по триумфот над Реал Мадрид, денеска во Премиер лигата го надигра и Манчестер Сити.

„Енфилд Роуд“ беше стадионот на кој гледавме уште еден брилијантен фудбалски натпревар од избраниците на Арне Слот, кои ова попладне во целост го надиграат тимот на Пеп Гвардиола и ја продолжија агонијата на шпанскиот стручњак.

Гвардиола и неговиот Сити го претрпеа шестиот пораз на последните седум меча во сите натпреварувања, а овој изразен со резултат 2:0 можеше да биде и далеку поубедлив.

Ливерпул доминираше во секој поглед и не искористи безброј шанси за уште покомотна победа, па слободно може да се каже дека актуелниот шампион избегна катастрофа на „Енфилд Роуд“.

Човек на одлука повторно беше Мо Салах кој најпрво мајсторски асистираше до Гакпо за 1:0 во првиот дел, за потоа да ја преземе одговорноста и да го изведе пеналот за 2:0 кој го изнуди Луис Дијаз.

Со оваа победа, Ливерпул се зацврсти на првото место на табелата во Премиер лигата, па по 13 одиграни кола има неверојатна предност пред Сити која гласи 11 бодови.

За видео од головите кликнете ТУКА