Моќната Франција го завери пласманот во полуфиналето, прв пораз за Австрија на турнирот во Германија

Франција го потврди фаворитскиот статус во дуелот со најголемото изненадување на турнирот во Германија, па така со победа од 33:28 и го нанесе првиот неуспех на Австрија.

„Триколорите“ го заборавија ремито со Швајцарија и запишаа три победа на трите досегашни натпревари во втората фаза, резултати со кои покрај тоа што се пласираа во полуфиналето, го заверија и првото место во групата 1.

Конечниот резултат дефинитивно не ја дава реалната слика за мечот кој го гледавме во текот на сите 60 минути, бидејќи Австрија потклекна дури во самата завршница, во која до израз дојде искуството, квалитетот, но и пошироката клупа.

Австрија покажа дека игра врвен ракомет и на полувреме со серија од 4:0 замина на пауза со предност од 16:15, но тоа се покажа како предизвик плус за фаворитите кои брзо одговорија.

Франција го промени ритамот и го диктираше темпото, па откако речиси цело второ полувреме одржуваше на „плус два“, на крајот стигна до максимални 33:28.