Митревски: Мораме да научиме една работа, оваа репрезентација има потенцијал…

Специјален известувач за „Дерби“ од Вараждин, Ристе Влахов

Македонија излезе како победник од пресметката со Катар на Светското првенство, победа од 39-34, победа во која свој придонес имаше искусниот Никола Митревски кој во изминативе денови се мачеше со вирус и висока температура.

Меѓутоа голманот на Еурофарм Пелистер е еден од лидерите, па со своето присутво на теренот даде дополнителна сигурност во вториот дел и овозможи да ја потврдиме оваа втора победа на Светското првенство.

-Пред се сакам да им честитам на сите играчи и стручниот штаб за одлично одработениот натпревар. Сите се заслужни за победата, ние сме тим, сите се подготвуваме заедно. Имавме разлика во второто полувреме која требаше да ја одржиме, ја зголемивме, па се намали. Ако во финишот бевме уште малку посериозни, ќе победевме поубедливо. Мора тоа да го научиме во иднина, да учиме од скандинавските репрезентации кои се најдобри во тоа, ќе те убијат во секое опуштање. Се надевам и против Франција ќе бидеме на нашете ниво, да се бориме до самиот крај.

-Катарците споро се враќаа назад, успеавме лесно да ги пробиеме. Имавме добро подготвена тактика за нивната одбрана. Чекор напред сме од претходните натпревари кои ги имавме, одиме чекор по чекор полека. Оваа репрезентација се уште има да учи, за да може да се носиме со оние најдобрите четири-пет селекции во светот. Има потенцијал, само со верба и работа може да се стигне на чекор од нив таму, за пример можеме да ја земеме една Португалија која игра одличен ракомет последниве години, не се ништо подобри од нас така да со тек на време и малку повеќе искуство на овие играчи ќе бидеме подобри на следните првенства, -порача Митревски.