Митревски и Порто го предизвикаа ПСЖ, но потклекнаа во второто полувреме

Никола Митревски и Порто го освоија првиот бод во Лигата на шампионите на мечот против Магдебург пред шест дена, но вечерва немаа сили за сензација против фаворизираниот ПСЖ.

Португалскиот тим беше одличен во првото полувреме и на пауза замина со предност од 17:16, отвори со гол и на стартот на вториот дел, но потоа не успеа да го одржи ова темпо и потклекна некаде на средината околу 40-та минута.

ПСЖ се врати и отиде на плус пет голови разлика, по што на крајот мечот рутински го доведе до мирна завршница и победи со 33:35 на гостувањето во Португалија.

Порто и натаму останува единствен тим без остварена победа оваа сезона во Лигата на шампионите и новиот биланс гласи осум порази и едно реми на девет одиграни меча.

Митревски повторно беше на ниво и мечот го заврши со девет успешни одбрани, но сепак тоа не се покажа како доволно за изненадување против „светците“.