Митрашиновиќ: Покажавме дека можеме да играме со секоја репрезентација, не се плашиме од  никого

Женската кошаркарска репрезентација претрпе два порази на квалификацискиот турнир во Рига, но на двете средби против Хрватска и Гермнија покажа квалитетна, борбена игра и дека повеќе не е лесен залак, „топовско месо“ за противниците како што беше во минатото.

Овие партии донесоа оптимизам во нашиот табор дека во блиска иднина добрата работа ќе биде наградена и ќе можеме да оствариме и некоја победа до крајот на квалификациите.

-Секако, со два пораза не можеме да бидеме задоволни, но со доста подмладен состав лично јас, но и останатите девојки сме среќни што прикажавме сосема друга слика во однос на претходниот прозорец. Покажавме дека можеме да играме со секоја репрезентација, и дека не се плашиме од  никого, -вели Анџелика Митрашиновиќ која смета дека со Јелена Антиќ и Александра Стојановска кои во овој период беа недостапни националниот тим ќе биде на уште повисоко ниво.

-Кога ќе се вратат Јелена Антиќ и Александра Стојановска ќе имаме уште подобра слика и поголеми очекувања. Морам да признаам дека со доаѓањето на Девана Бонер, пред сè како личност, и како играч, значи многу  за секоја од нас. Не се откажуваме. Се надевам дека во февруари со Јелена и со Александра во тимот ќе се избориме за две победи и ќе го вратиме респектот кон нас како една сериозна репрезентација, -порача Митрашиновиќ која против Германија даде 30 поени.