Миротиќ се врати и ја предводеше Барселона до нов триумф, Валенсија му зема мерка на Партизан во Белград (ВИДЕО)

Никола Миротиќ имаше фантастичен кам-бек на терените и во својот прв меч по повредата ја предводеше Барселона до триумф над Алба Берлин (88-86) во рамките на 11. коло во Евролигата.

Искусниот ас ги надмина проблемите кои ги имаше со ахиловата тетива, односно со 19 поени, 6 скока и 3 асистенции покажа дека повредата е зад него и дека ќе биде големо засилување за каталонците во преостанатиот дел од сезоната.

Покрај Миротиќ одличен беше и Лапровитола со 16 кошеви, додека еден помалку имаше Хигинс. Ова за Барса беше трето славје во серија, осмо во натпреварувачката 2022/2023.

Партизан пак го загуби трилерот со Валенсија со 100-96. „Црно-белите“ важеа за фаворити на хартија, ама тоа не го потврдија на паркетот каде мораше да се играат и дополнителни пет минути за да се добие победникот.

Риверо и Џејмс Веб искомбинираа 40 поени, дабл-дабл кај Партизан имаше Лесор (22 поени и 10 скокови).

Останати резултати: Анадолу Ефес-Олимпијакос 82-71, Асвел-Монако 75-84, Басконија-Милано 78-62.