Миркуловски дебитираше со триумф против Кузмановски и Хановер

Челните луѓе на Вецлар пред неколку дена му дадоа голема доверба на Филип Миркуловски и го назначија за тренер на тимот, а легендарниот македонски репрезентативец вечерва имаше успешно деби на клупата.

Во натпреварот од 14-то коло во ракометната Бундеслига, Вецлар на првиот меч во новата улога на „Жути“ победи на гостувањето кај Хановер со 23:26.

Вецлар претрпе дури девет порази во првите 13 кола и тоа го натера раководството да направи смена на најодговорната функција, а четвртата победа во сезоната прави тимот да избегне од опасната зона на табелата.

Момците на Миркуловски ја најавија победата со водството од 10:14 на полувреме, а во вторите 30 минути, ја одржаваа предноста и се изборија за важен триумф.

Интересно, противник на Миркуловски во неговиот прв тренерски предизвик беше Филип Кузмановски, кој мечот го заврши со два гола од три обиди.