Мирчевски претставен во Железничар: Навивачите можат да очекуваат голови и асистенции

Мартин Мирчевски и официјално беше претставен како ново засилување за шесткратниот шампион на Босна и Херцеговина, тимот на Железничар.

Мирчевски по епизодата во ТСЦ Бачка Топола доби понуда од клубот од Сараево, понуда која ја прифати и потпиша договор на една година со опција истиот да може да биде продолжен за дополнителна сезона.

-Првите впечатоци се феноменални, слушнав многу за клубот, голем клуб и чест ми е што доаѓам во клуб кој има добри навивачи и се надевам дека оваа сезона ќе бидеме во горниот дел од табелата. Работев за време на паузата, секогаш бев подготвен во кариерата, сега уште малку да се вклопам со тимот, -рече Мирчевски кој во Жељо ќе соработува со Матеј Цветаноски.

-Јас и Матеј се знаеме, многу ќе ми помогне, кога си во друга држава добро е да имаш некој свој, но со сите ќе бидам најдобар. Навивачите можат да очекуваат пред се голови и асистенции, добри игри, желба за победа и борба за клубот, -порача нашиот интернационалец.