Миовски: Сонувам да играм во Премиер лигата, мој омилен клуб…

Бојан Миовски има одлична прва сезона во дресот на Абердин и со 15 постигнати гола е најдобар стрелец на својот тим во најквалитетната фудбалска конкуренција во Шкотска.

Овие негови изданија дефинитивно го привлекоа интересот на јавноста, клубовите и ако ја заврши кампањата во посакуван ритам може да се надева и на топ трансфер во летниот преоден рок. Тој воедно станува и се повеќе значаен играч во репрезентацијата каде во последниве мартовски натпревари забележа гол и асистенција на дуелите со Малта и Фарски Острови што дефинитивно ќе му помогне дополнително да ја крена самодовербата.

Секако секој играч има поставено цел, сон, а на Миовски е на игра во Премиер лигата.

-Целта ми е да продолжам во клуб од најдобрите пет (Англија, Шпанија, Италија, Германија и Франција) лиги во Европа, а доколку можам да изберам една, тоа дефинитивно би била англиската Премиер лига.

-На секој играч целта му е да го достигне највисокото ниво во фудбалот, а англиската Премиер лига ме привлекува поради фактот дека е најатрактивна и најгледана лига во светот. Јас сум огромен фан на Реал Мадрид, но од англиските клубови гo следам односно го поддржувам Манчестер јунајтед, -порача напаѓачот за PopUp.

Бојан ја започна кариерата во Брегалница, па преку Работнички, Македонија Ѓорче Петров, Ренова и унгарски МТК пристигна во Шкотска.