Миовски го издвои најголемиот квалитет на овој македонски тим: Повторно го покажавме тоа

Бојан Миовски самиот се избори за акција по која постигна гол за 2:0, момент кој дефинитивно го реши прашањето околу тоа кој ќе ги освои трите бода на дуелот меѓу Македонија и Ерменија.

Новиот напаѓач на Џирона имаше соло минијатура и успеа да ја измами комплетната одбрана на Ерменија, вклучвајќи го и голманот кого го фати на погрешна нога.

Миовски како главна игла во нападот на Македонија беше клучен за неколку опасни контри кои ги изведовме во второто полувреме, а по победата од 2:0 говореше и за најголемиот квалитет на овој македонски тим, кој според него е менталитетот.

– Нормално дека беше тешко да се победи на еден ваков меч. Рано добивме црвен картон, имавме лош резултат против Фарски Острови, но повторно го покажавме тоа во што сме најдобри.

– Овој тим има менталитет, победува и кога е најтешко. Со црвен картон постигнавме два гола и победивме. Беше тешко да се пробие Ерменија, но успеавме да се заканиме преку контри и постигнавме голови.

– Од прв момент јасна цел ни е да бидеме први во оваа група. Почнавме лошо во првото коло, но сега освоивме три бода и наша цел е првото место во оваа група, – изјави Миовски.