Министерот Ристовски и раководството на РФМ ги посетија ракометарките пред ЕП

Женската сениорска ракометна репрезентација за брзо време ја очекува настап на Европското првенство каде во Дебрецен ќе ги одмери силите со домаќинот Унгарија, Шведска и Турција.

Нашата селекција тренира во Скопје, а во пресрет на големиот настан и предизвик тимот беше посетен од министерот за спорт Борко Ристовски и раководството на РФМ претставено преку првиот човек Живко Мукаетов и генералниот секретар Филип Милошевски.

-Најважно е да го дадете својот максимум и да дадете сe од себе наова Европско првенство. Ќе почувствувате можеби и позитивен
притисок бидејќи цела Македонија ќе ве гледа, ќе навива за вас.

-Многу е важно да отидете подготвени да жртвувате дел од себе и од своите емоции, покрај спортскиот квалитет, да дадете нешто за
својата држава. Можам да пренесам од лично искуство дека претставува голема чест и задоволство да се настапува за Македонија
и е голема привилегија да се носи националниот дрес. Без разлика на резултатот вие секогаш ќе бидете најдобрите од Македонија. Гордо да ја претставите државата, да бидете горди претставници на македонскиот ракомет.

-За сe што ви треба ние сме тука како министерство и како држава да ви помогнеме и сите недостатоци доколку ги има, да се обидеме заедно да ги надминеме и да ги исправиме. Без разлика дали сме таму со вас или овде, сите ќе ве следиме и ќе навиваме. Останете здрави, останете успешни и позитивни. Со среќа на ЕП, -порачал министерот Ристовски на средбата со македонските репрезентативки.

Македонската репрезентација утре заминува за Пореч, Хрватска каде ќе учествува на турнирот „Кроација куп“ што ќе биде последна проверка пред настапот на ЕП.

Шампионатот за Македонија официјално започнува на 28 ноември со Шведска. Два дена подоцна играме со Турчинките, а за крај на оваа фаза следи пресметката со Унгарките.

foto:www.facebook.com/rfmofficial