Милевски пред мечот во Струмица: Вистинска шанса за да видиме со каков квалитет располагаме

По големиот вложен напор кој за жал не донесе резултат против Украина, македонската фудбалска репрезентација ќе биде слободна во најновата рунда во квалификациите за Европското првенство, но тоа не значи дека нашите фудбалери нема да одиграат натпревар.

Федерацијата закажа контролка против Ерменија и натпреварот ќе се одигра утре на „Благој Истатов“ стадионот во Струмица, а денеска најава за истиот дадоа селекторо Благоја Милевски и Елиф Елмас.

– По исцрпувачкиот меч против Украина, планот е на натпреварот против Ерменија да им дадеме шанса на фудбалерите кои треба да го потврдат потенцијалот во репрезентацијата. По тешкиот меч во Прага, ќе видиме колку фудбалерите чувствуваат физички замор. Нема повредени играчи и пред натпреварот ќе одлучиме кој ќе започне.

– Ерменија е добра селекција за контролка, станува збор за репрезентација чиј квалитет расте и овој тим одигра одлични квалификации досега. Ова за нас е одлична можност да го провериме потенцијалот со кој располагаме.

– Можност ќе добијат сите, но ќе одлучиме за минутажата на фудбалерите. Оваа селекција секогаш оди на победа, така ќе биде и утре против Ерменија, – изјави Милевски.