Милевски: Групата е тешка, денешниот фудбал признава само еден пристап

Македонската фудбалска репрезентација оваа вечер ги дозна своите три ривали во третото издание на Лигата на нации, а иако истите не изгледаат премногу комплицирано на хартија, селекторот Благоја Милевски е максимално претпазлив.

Лидерот на националниот тим својот најтежок испит ќе го има во месец март кога се игра баражот на Светското првенство, па потоа во јуни и септември ќе ги игра натпреварите против Бугарија, Грузија и Гибралтар.

– Групата е тешка, но во денешниот фудбал нема лесен противник, или однапред запишани бодови. Не очекуваат сериозни натпревари. Грузија е репрезентација против која одигравме неизвесни натпревари во последниот период.

– Бугарија одигра нерешено против Европскиот првак, Италија. Тоа значи дека нашиот противник бележи значителен напредок. Гибралтар се разбира дека не е истата селекција од првото издание на Лига на нации кога се соочивме во иста група.

– Македонија мора да биде на највисоко ниво на секој натпревар. Денешниот фудбал, едноставно не трпи поинаков пристап. Се што ќе бараме од фудбалерите и целиот наш тим е максимално залагање на сите натпревари.