Милан со пресврт до дуел со Интер за пехарот во Супер Купот на Италија (ВИДЕО)

Екипата на Милан ќе го предизвика Интер во финале на Супер Купот на Италија.

„Црвено-црните“ во второто полуфинале се изборија за славје над Јувентус од 2-1 иако беа во негатива по првото полувреме. „Старата дама“ го доби првите 45 минути благодарение на погодокот на турскиот репрезентативец Јилдиз во 21 минута.

Јуве на стартот на вториот дел имаше можност да ја зголеми предноста, но откако тоа не го направи Милан буквално го дочека своите пет минути и од 71 до 76 го сврте резултатот во своја полза.

Пулишиќ со удар од белата точка израмни на 1-1 за да потоа набрзо Гати си постигне автогол по топката која ја испрати Муса.

До крајот немаше промени или поточно најголемата шанса за 2-2 не ја искористи дефанзивецот Гати во судиското продолжение.

Овој резултат воедно значи дека Консеисао имаше победничко деби на клупата на „росонерите“.