Милан се врати од два гола негатива, Гинтер со урнебесен автогол предизвика ерупција на „Сан Сиро“ (Видео)

Милан на ужасен начин го започна натпреварот против Верона и по првите 45 минути имаше негатива од 0:2, но повеќе загрижувачки беше тоа што тимот на Пиоли делуваше доста лошо на теренот и на моменти безидејно.

Головите на Капрари и Барак беа сериозен предизвик за „росонерите“, кои сепак успеаја да се приберат и разбудат во вториот дел, во кој режираа спектакуларен пресврт, трет денеска по оној на Специја-Салернитана и на дербито меѓу Лацио и Интер.

По трите извршени замени на Пиоли, Милан намали со голот на Жиру во 59-та минута, што се покажа како најава за целосен пресврт кој следеше во продолжение.

Кеси израмни од пенал на 2:2, а по влегувањето на Златан Ибрахимовиќ кој ја залечи повредата, урнебесен автогол си постигна дефанзивецот Гинтер.

Германецот со турско потекло реагираше катастрофално и на комичен начин си ја смести топката во својот гол, со што предизвика ерупција од радост на „Сан Сиро“.

Со остварената победа, Милан се искачи на врвот и ќе чека расплет од утрешниот меч меѓу Наполи и Торино.