Милан се пофали со четвртото засилување, Ибрахимовиќ порача: Тимот е комплетиран

Екипата на Милан оваа вечер ќе ја започне новата кампања во Серија А и тоа со домашен меч против Торино, но како загревање за тоа што следува клубот од Милано го официјализираше четвртото летно засилување.

Нов член на поранешниот италијански и европски шампион е францускиот репрезентативец, Јусуф Фофана кој во новата средина доаѓа од Монако за пакет од 25 милиони евра.

Тој успешно ги мина медицинските прегледи и стави потпис на договорот до 30 јуни 2028 година.

-Со Фофана баравме играч од средниот ред кој носи рамнотежа во тимот. Тој е комплетен играч и може да ги прекине акциите. Ова беа едни од најдолгите преговори со кои моравме да се справиме, но тој конечно е тука, -рече Златан Ибрахимовиќ кој порача дека екипата сега е комплетна, односно дека нема да има нови засилувања.

-Тимот сега е комплетиран-подвлече Ибра.

„Црвено-црните“ претходно ги доведе Алваро Мората, Страхиња Павловиќ и Емерсон Ројал.