Милан планира реконструкција со поранешен „тандем“ на Јувентус

Милан во Серџо Консеисао веќе го има вториот тренер сезонава, но раководството не е задоволно од Португалецот и неговите методи на работа и веќе размислува за следната опција.

Барем така тврдат дел од италијанските медиуми, кои најавуваат дека менаџментот и Златан Ибрахимовиќ планираат голема реконструкција.

Истата подразбира ангажирање на поранешниот спортски директор на Јувентус, Фабио Паратичи, кој во меѓувреме работеше и во Тотенхем и во моментов е без ангажман. Паратичи заработи суспензија долга 30 месеци поради финансиските нерегуларности во периодот кога работеше во торинскиот клуб, но таа казна му истекува веќе во јули.

Во пакет со Паратичи би требало да дојде и искусниот Маурицио Сари, кого Паратичи го доведе во Јувентус, но таму не остана долго, а во моментов е без ангажман по „разводот“ со Лацио.

Паратичи и Сари би биле задолжени и за реконструкцијата на ростерот, но доколку оваа информација не остане само на ниво на шпекулација.

Покрај елиминацијата од Лигата на шампионите по двомечот со Феенорд, Консеисао ги иритира одговорните во Милан и со дел од своето однесување, но и конфликтот кој го отворил со неколку фудбалери.