Милан не запира, сега влезе во преговори со Барселона за ангажман на играчот на „каталонците“

Милан дефинитивно е клубот кој е најактивен на трансфер пазарот во јануарскиот преоден рок.

„Росонерите“ досега го ангажираа Меите од Торино, а се очекува само официјална промоција на Марио Манџукиќ кој ќе го засили нападот на тимот предводен од Стефано Пиоли.

При крај е и договорот со Члеси за услугите на Фикајо Томори кој ќе пристигне како позајмен фудбалер со право на откуп на неговиот договор и се очекува младиот стопер во следниот период да пристигне во Милано.

Сега, „Газета дело Спорт“ пишува дека од Милан преговараат и со Барселона за ангажман на нивниот фудбалер, Жуниор Фирпо.

Станува збор за лев бек кој не се снајде на „Камп Ноу“ и кој би можел да си оди од клубот оваа зима. Милан има недостиг од леви бекови затоа што на таа позиција го има само Тео Ернандез кој сега е надвор од составот поради позитивен тест на Ковид-19, а него го менува Диого Дало чија примарна позиција е десен бек.

Исто како и со Томори, Милан ќе се обиде да го ангажира Фирпо на позајмица со можност за целосен откуп на неговиот договор во летниот преоден рок.