Милан ќе „жртвува“ искусен играч за да се засили со голем талент од Бундеслигата

Милан речиси целосно го формираше тимот за новата сезона, но Златан Ибрахимовиќ и директорите на клубот меркаат уште еден фудбалер за кого треба да пронајдат место во ростерот.

Откако Пјер Калулу е испратен на заем во Јувентус за сума нешто поголема од 3 милиони евра, Милан мора да продаде уште двајца играчи за да го добие Ману Коне од Борусија Менхенгладбах.

Очекувано е Јасир Адли да замине ова лето, но она што Милан мора да го жртвува е искуството на Исмаел Бенасер, кој не е во прв план кај Пауло Фонсека, но можеше да остане како поддршка во долгата сезона во која „росонерите“ ќе играат на неколку фронта.

Сепак, интересот за Бенасер од клубови од Саудиска Арабија оди во прилог на Милан, а и фудбалерот е заинтересиран за добрите понуди од азиската земја, при што најблиску до неговиот потпис е Ал Кадсија. Адли е поблиску до катарското првенство, но може да биде и позајмен во некоја друга средина, по што Милан ќе има чист терен за ангажман на Коне.

Медиумите тврдат дека бундеслигашот бара 20 милиони евра за Коне, а евентуалниот трансфер ќе значи дополнително засилување во средниот ред, каде италијанскиот клуб веќе го обезбеди и Јусуф Фофана од Монако.