Милан и Рома во напредни преговори за изненадувачка размена на двајца фудбалери

Како што се ближи самата завршницата на летниот преоден рок, така европските клубови ги активираат и последните очајнички обиди за да се добие посакувано засилување, а доста раздвижено во последните 48 часа е во Италија.

Најважните клубови во Серија А се очекува да комплетираат неколку важни зделки до утре на полноќ, а како што јавуваат угледните медиуми од Апенините, Милан и Рома се во напредни преговори за да пополнат празни места во своите тимови со изненадувачка размена на фудбалери.

Милан по секоја цена посакува да донесе уште еден напаѓач и го има пикирано Тами Ејбрахам од Рома, додека на спротивната страна треба да заврши Алексис Салемакерс.

Угледната „Газета“ информира дека преговорите се во напредна фаза и дека двата клуба се на добра бранова должина во овој момент, па договор би можел да биде постигнат и до крајот на денот.

Во прв момент се говори за класична размена на двајцата фудбалери, со тоа што Рома ќе инкасира дополнителни 10 милиони евра поради повисоката пазарна вредност на англискиот напаѓач.