Милан и РБ Лајпциг во финални преговори за еден трансфер

Претставници на раководствата на Милан и РБ Лајпциг интензивно преговараат за реализација на јануарски трансфер, а се очекува финалниот договор да биде постигнат викендов.

Италијанските медиуми тврдат дека вчера приватен авион бил подготвен за полетување со Ноа Окафор кон Лајпциг, но преговорите заглавиле на одредени детали и крилниот напаѓач и натаму е меѓу двата клуба.

Тимот на нашиот Елиф Елмас се обидува да договори заем, со обврска за откупување на договорот по крајот на сезоната, а Милан би требало да заработи најмалку 16 милиони евра од целиот трансфер.

Претпоставките се дека испраќањето на Окафор во бундеслигата е поврзано и со отворање простор за евентуално пристигнување на Маркус Рашфорд, но Швајцарецот и онака не добиваше многу простор во тимот на „росонерите“ сезонава.

Окафор дојде во Милан од Салцбург, па за него овој трансфер ќе биде враќање во семејството на Ред Бул клубовите.