Милан е прв клуб кој направил конкретен чекор за разочараниот Олмо

Дани Олмо не ја крие разочараноста од фактот што не може да биде регистриран од Барселона за вториот дел од сезоната, но неговиот агент неколку пати потенцираше дека не планира да го напушти шпанскиот клуб.

Сепак, никој не може да предвиди кога Барса ќе го реши проблемот и како ќе размислува Олмо наредниот период, а многу европски клубови ја следат ситуацијата и посакуваат да го добијат шпанскиот репрезентативец како слободен агент.

Италијанските и каталонските медиуми пренесуваат дека Милан е клубот кој прв направил конкретен чекор, но со опција која е поприфатлива за Барселона, а тоа е шестмесечен заем на Олмо.

„Росонерите“ се подготвени да ја покриваат платата која Шпанецот ја добива во својот актуелен клуб, а по крајот на сезоната тој ќе може да се врати во матичниот клуб и во поразлична ситуација да добие регистрација која веќе нема да му создава проблеми.

На овој начин Олмо сигурно ќе добие сериозна минутажа, а ќе продолжи да игра и во Лигата на шампионите, додека клубот ќе се ослободи од притисокот поврзан со неговиот случај.