Миќовиќ имаше кошаркарска симултанка, МЗТ го победи ТФТ

МЗТ Скопје успеа да се рехабилитира од тешкиот пораз кој го претрпе од Партизан во АБА лигата, такашто денеска победи на првиот меч во македонската кошаркарска лига во 2023-та година.

„Металците“ наидоа на жесток отпор од ТФТ во првото полувреме кое заврши со резултат 54:54, но како одлучувачка се покажа третата четвртина во која домашниот тим ја направи клучната разлика.

Македонскиот првак го доби овој дел до 28:9 и си обезбеди предност од 19 разлика, која на крајот се покажа како недостижна и покрај неверојатната серија на ТФТ на стартот на последниот период.

Тимот од Тафталиџе отвори во последната четвртина со 12:0, потоа дојде и на само минус четири (83:79), но во тие моменти загуби здив и последната серија на МЗТ се покажа како пресудна за конечниот резултат.

МЗТ одговори со 8:0 и победи 91:81, а најдобар играч на паркетот беше Страхиња Миќовиќ кој имаше брутално издание со 34 поени и 17 скокови.