Михаљевиќ и во иднина ќе го чува голот на Пролет

Екипата на Тинекс Пролет и во иднина ќе може да смета на услугите на голманот Данило Михаљевиќ.

Македонскиот прволигаш е задоволен од изданијата на Црногорецот, исполнети се очекувањата и поради тоа е продолжена соработката со играчот кој пристигна во скопскиот тим минатото лето.

-Презадоволни сме од сето она што Данило го покажа на голот на Тинекс Пролет од моментот на неговото доаѓање па се до ден денеска. Тој е вистински професионалец, играч што е тука за тимот и за соиграчите и презадоволни сме што останува во Пролет уште најмалку една година, -вели за официјалната бев страна на клубот директорот, Сашо Огњеновски.

Огњеновски воедно говореше за амбиции на клубот за наредната сезона.

-Нема дилема дека повторно ќе атакуваме на висок пласман, цел ни е најпрвин да влеземе во плејофот, а потоа и да се бориме за место во Европа. Младите играчи кои добија шанса изминатите месеци ќе бидат поискусни, речиси сите првотимци ќе останат, а во преговори сме за доведување на две до три квалитетни засилувања, -порача Огњеновски.