Михајлов со прва изјава како тренер на Вардар: Ова е најголемиот бренд во Македонија, целта е јасна

По потврдата за тренерската смена на релација Вардар-Силекс, најтрофејниот македонски клуб денеска официјално го промовираше Горазд Михајлов, кој после извонредната етапа во Кратово доаѓа во Скопје за да го спаси најголемиот клуб во нашата земја.

Искусниот стручњак изгради репутација во Првата македонска фудбалска лига и добро знае што значи да се работи под притисок, а и самиот е свесен дека го чека многу тешка втора полусезона во нашата елита.

Вардар се бори за опстанок и главна цел ќе биде да не испадне во Втора лига, со тоа што Михајлов на денешниот прес посочи дека ќе може далеку помирно да се работи со стабилизирањето на финасиската состојба.

ФК Вардар конечно ги доби парите од Град Скопје и ќе има помирна пролет, а Михајлов најави дека ќе даде максимум со стручниот штаб за да го задржи тимот во елитата.

– Посебно се радувам што се вратив од местото од кое потекнувам, заочнав во фудбалската школа на Вардар и сега повторно сум во својот дом. Сите знаеме каква е ситуацијата во клубот, но ме радува што се стабилизира ситуацијата на финансиски план.

– Вардар е клуб на народот, најголемиот бренд во Македонија и така треба да се однесуваме кон него. Ветувам дека ќе го дадеме најдоброто со моите соработници, истото важи и за фудбалерите. Се нафативм да работиме и да ја оствариме целта. Секој од наредните 15 натпревари ќе биде како финале за нас, секој бод ќе ни биде важен и драгоцен. Целта е да обезбедиме опстанок, се нафатив на оваа работа бидејќи го познавам овој тим на Вардар. Двапати игравме со Силекс против нив изминатава есен и знам дека тимот поседува потенцијал, – изјави Михајлов.

На прес-конференцијата исто така беше соопштено дека нов спортски директор на Вардар е Влатко Колев.