Михаилов замина, Вардар остана без тренер по две кола од новата сезона

Еден ден по победата над големиот ривал Пелистер, Вардар остана без тренер и ќе треба да бара замена за досегашниот предводник Горазд Михаилов.

Клубот денеска официјално соопшти дека соработката со Михаилов е завршена на барање на тренерот и му се заблагодари за досегашната работа на клупата на Вардар, екипа на која успеа да и обезбеди опстанок минатата сезона.

– Фудбалскиот клуб Вардар ја известува јавноста дека Горазд Михаилов, досегашниот шеф на стручниот штаб, поднесе оставка на функцијата и повеќе нема да ги предводи црвено-црните.

– Горазд Михаилов во клубот пристигна минатата полусезона и успеа да ја исполни главната цел на навивачите и клубот, обезбеди опстанок во ПМФЛ, а покрај тоа оствари и значајни резултати, кои секако дека остануваат да сведочат за професионализмот и посветеноста.

– Тој си заминува поради приватни причини, а со раководството на клубот во пријателски однос е постигнато взаемно прифатливо решение. Во името на клубот, му се заблагодаруваме за ангажманот, за сите победи, но и за тоа што кога беше тешко, застана и ја водеше екипата во најважните предизвици, – стои во соопштението на Вардар.