Михаилов е нов предводник на Брера

Раководството на македонскиот прволигаш Брера експресно пронајде замена за Бојан Круљ и денеска го промовираше Горазд Михаилов за свој нов тренер.

Слабата резултатска серија донесе разделба со српскиот стручњак, а Михаилов е тој кој ќе ја преземе струмичката екипа и ќе се обиде да ги оствари клупските амбиции.

Михаилов до неодамна беше тренер на Вардар, екипа со која минатата сезона обезбеди опстанок во Првата македонска фудбалска лига, а сезонава ја напушти по две кола.

Брера го потврди Михаилов со официјално соопштение.

– Горазд Михаилов денеска го превзеде тимот. Со играчите имаше состанок а го одработи и првиот тренинг на Спортскиот центар Пандев. Михаилов беше тренер на скопски Вардар каде во средината на август по победата над Пелистер си поднесе оставка.
Во стручниот штаб на Михаилов помошници ќе му бидат Тане Темелков и Тони Атанасов кој од младинскиот погон се префрлува во сениорите, кондиционен останува Дарко Коцев а со голманите Ѓорѓе Шопов.

– Михаилов е добро познат на македонската фудбалска јавност и како играч и како тренер. Во својата кариера ги има водено и екипите на Силекс, Борец од Велес, Тетекс, Напредок, Пелистер и Охрид, а извесен период беше и во Приједор во Босна и Херцеговина, – стои во клупското соопштение.

Брера во првото коло го победи токму Вардар, тогаш предводен од Михаилов, но во следните три рунди забележа исто толку порази и се наоѓа на дното на табелата во друштво на црвено-црните од Скопје.