Меси се пожали од судијата: Очајно сакаше да ми покаже картон (Видео)

Барселона едвај успеа да го совлада Валјадолид и ја намали негативата зад лидерот Атлетико Мадрид, па порелаксирано ќе се подготвува за претстојното „Ел Класико“.

Голот за победа го постигна Усман Дембеле, а Лионел Меси не само што не реализираше, туку очигледно имаше проблем и со главниот судија.

Ова го открива видеото снимено по крајот на првото полувреме, кога Аргентинецот се упатува кон соблекувалната и се пресретнува со делегатот на средбата.

– Очајно сакаше да ми покаже жолт картон. Неверојатно… – му се пожали Меси на делегатот, алудирајќи на судијата Латре, кој според него сакал да го елиминира за настап на „Ел Класико“ бидејќи на тој начин ќе има кумулиран број на картони за автоматска суспензија.

Дербито меѓу Реал Мадрид и Барселона се игра во сабота од 21 часот и ќе има големо значење во борбата за шампионската титула во Ла Лига.