Меси ја анализираше новата Барселона и даде јасен заклучок, Флик му одговори

Лионел Меси е најдобриот играч во историјата на Барселона, а како таков се уште внимателно го следи својот поранешен клуб и покрај сите активности, задачи што ги има во Интер Мајами.

Каталонците се пријатно изненадување во актуелнава кампања затоа што со многу млади играчи, играчи од својата школа имаат навистина квалитетни изданија како во Ла Лига каде се на првата позиција така и во Лигата на шампионите.

-Многу сум горд што гледам како првиот тим го претставува клубот во моментов. Оваа Барса е спектакуларна, иако не ме изненадува. Не е ништо ново, тоа секогаш се случувало, или барем откако пристигнав во клубот како 13-годишен. Спектакуларно е што децата имаа шанси во последните две години и кога ќе им верувате, вака реагираат затоа што го познаваат клубот подобро од кој било. Од мали се навикнати да играат на овој начин. Ако им дадете можност, овие работи се случуваат, како што се случи во нашата ера, -порача Лео Меси за „ТВ3“.

На овие зборови свој коментар имаше тренерот на клубот од „Камп Ноу“, Ханси Флик.

-Чест е што најдобриот играч на Барса во историјата на [клубот] го кажува ова и што следи како игра тимот и како играат младите играчи. Тој е секогаш со целото свое срце во овој клуб и тоа значи многу за нас и за целиот тим, -порача Флик кој го подготвува тимот за соочувањето со Селта Виго.