Меси е номиниран за МВП во МЛС иако одигра само 247 минути за Интер Мајами

Лионел Меси го потврди својот препознатлив фудбалски квалитет и по преселбата во Интер Мајами, но голем дел од американската фудбалска јавност е изненадена што е доби двојна номинација за наградите за најдобрите во актуелната МЛС сезона.

Аргентинецот е номиниран за МВП и за најдобар дебитант во лигата, нешто што би било сосема вообичаено ако Меси не одиграше само 247 минути во МЛС, односно забележа настап на само четири натпревари во американската професионална фудбалска лига.

Фановите на ривалите на Интер Мајами сметаат дека одлуката е бизарна и поради фактот што Меси пропушти пет од последните шест натпревари во лигата, ситуација која беше последица на повредата на големата ѕвезда.

Меси досега има 12 настапи за Интер Мајами, екипа за која постигна 11 погодоци, но само еден од нив беше во рамките на МЛС.

Во иста ситуација како Меси е и Серхио Бускетс, кој исто така е номиниран за двете признанија иако дојде во клубот заедно со Аргентинецот.

За МВП признанието ќе се борат и Хани Муктар, Лучијано Акоста, Ектор Ерера, Роман Бурки и Тиаго Алмада.