МекКарти: Визијата на Тен Хаг беше да го води Јунајтед една деценија

Ерик тен Хаг стана уште еден менаџер, кој по неколку сезони мораше да го отстапи своето место во Манчестер Јунајтед, пред се поради недоволно поволните резултати на екипата, а неговиот асистент Бени МекКарти има многу високо мислење за холандскиот стручњак.

Поранешниот јужноафрикански репрезентативец и напаѓач со долга европска кариера имаше привилегија да работи во редовите на англискиот великан, а од неодамна е назначен за нов селектор на Кенија.

Во последното интервју, МекКарти зборувал за Тен Хаг и неговиот став за потенцијалот и квалитетите на Холанѓанецот.

– Беше неверојатно голема привилегија да работам во еден од најголемите клубови во светот, под водство на Ерик тен Хаг.

– Видов што е високо ниво на професионализам бидејќи тренерот со кој работев не е само дисциплиниран, туку беше и еден од најголемите професионалци кои сум ги сретнал во рамките на фудбалската кариера.

– Работеше напорно, посветено и страсно и неговата визија беше да го води Јунајтед десет години. Иако сите зборуваа во колку лоша позиција е клубот, ние освоивме трофеј во ФА и Карабао купот, – рекол МекКарти, кој работеше две сезони како асистент на Тен Хаг.