Мекинро го пронајде својот најголем кошмар во „големата тројка“: Не би сакал да играм со него

Џон Мекинро мораше да ја прифати реалноста и да заклучи дека Новак Ѓоковиќ е најуспешен тенисер на сите времиња, иако негов миленик и натаму останува швајцарскиот тениски маестро, Рожер Федерер.

Легендарниот Американец се истакнува по тоа што не штеди пофални зборови за сите претставници од „големата тројка“, а во своето последно обраќање посебно се задржа на Федерер и Надал.

– Федерер е најелегантниот тенисер кој некогаш го имам видено и затоа е мој миленик. Претходно, јас го идолизирав Род Лејвер. На пример, Надал не е прототип за професионален тенисер. Неговиот горен дел од телото е многу голем, а нас на времето ни велеа да не вежбаме и да не креваме тегови.

– Мој најголем сон би бил да играм против Федерер на Вимблдон, додека најголем кошмар би било да играм против Рафаел Надал на Ролан Гарос.

– Не би сакал да играм со него, јас пораснав играјќи на земја и тоа беше моја омилена подлога се до моментот кога станав професионалец. Тоа што го направи Надал на земјена подлога е вистинска лудост, – завршува Мекинро.