Меѓу нив ќе се бара победникот: Бекер посочи кои играчи можат да ја освојат титулата на Ролан Гарос

Пред нас е вториот календарски грен слем Ролан Гарос на кој нема да биде присутен „кралот на земјата“, човекот кој доминираше низ годините на овој турнир Рафаел Надал.

Надал поради повредата мораше да го откаже настапот, а тоа значи дека сега има повеќе простор за останатите, односно имаат далеку поголема шанса за триумф на Френч Опен. Борис Бекер како еден од најголемите асови во историјата на овој спорт даде прогнозата околу тоа кој може да слави во Париз, па така според него победникот ќе се бара меѓу четворица имиња.

-Мои фаворити се Новак Ѓоковиќ, новопечениот победник на турнирот во Рим, Медведев, Холгер Руне и Карлос Алкарас. Претходните 15 години главното прашање беше кој ќе игра против Надал во финалето. Сега сите останати играчи имаат реални шанси, -порача Бекер.

Борис даде коментар и за најавата на Надал за завршување на кариерата.

-Тоа ќе биде огромна загуба за машкиот тенис. Се надевам дека следната година тој ќе може здрав да игра на своите омилени турнири, да оди на проштална турнеја. Јас сум голем обожавател на неговиот успех и човечност, -заклучи Германецот.