Мбапе за својот наследник кој брзо почна да воодушевува во ПСЖ: Немој да ме барате кога нема да му оди

ПСЖ изгледа фуриозно на стартот на пост ерата Килијан Мбапе, бидејќи тимот на Луис Енрике победи во првите три рунди во Лига 1, и тоа со гол разлика 13/2.

„Светците“ изгледаат навистина воиграно на овој почеток и се чини дека фановите полека го забораваат влијанието кое го имаше новата ѕвезда на Реал Мадрид, која како и сите останати медиуми од Франција, признава дека е воодушевен од изданието на неговиот наследник.

Бредли Баркола запоседна на левата крилна позиција во нападот и изгледа незадржливо во овој момент, за што говорат и бројките кои велат дека младиот фудбалер постигна четири гола во првите три рунди против Ле Авр, Монпелје и Лил.

Мбапе како француски капитен денеска давал одговори на поставените прашања од новинарите, а едно било поврзано токму за неговиот наследник во Париз.

– Не сум изненаден од неговиот напредок и неговиот учинок на стартот на сезоната. Среќен сум за Баркола, не само поради тоа што е извонреден играч, туку и поради фактот што е извонредна личност. Му посакувам се најдобро. Се надевам дека ќе внимавате на него и дека ќе го пазите. Сега е старт на сезоната, сигурно ќе има натпревари кога нема да дава голови, но немој тогаш да доаѓате да ме барате и да ме прашувате за него поради тоа што не направил ништо.

– Тој е млад и неговиот потенцијал е неверојатен. Му посакувам се најдобро и може да биде само подобар. Неговиот раст е добра вест за сите нас, но треба да внимавате и да не му пренесете голем притисок со вашите очекувања, – им порачал Мбапе на новинарите.