Мбапе се погрижи за деби од соништата, Реал Мадрид освои нов европски трофеј во Варшава (Видео)

Килијан Мбапе се најде во фокусот во увертирата за мечот со Аталанта и сите се прашуваа дали ќе добие шанса во стартната постава, но не само што се најде во почетните 11 на Карло Анчелоти, Французинот се погрижи да има и деби од соништата.

На својот прв настап како член на „кралскиот клуб“, Мбапе го пронајде патот до голот и го постигна вториот гол во мрежата на Аталанта, па со тоа стави крај на надежите на Италијанците на денешното финале во Варшава.

„Ла Деа“ успеваше да му парира на Реал речиси еден час и изгледаше како тим кој добро ги неутрализира ѕвездите во бело, но во 59-та минута пристигна едно лошо изнесување на топката, кое резултираше со продор на Винисиус и гол на Валверде.

Веднаш по овој погодок, Реал заигра уште поагресивно и Винисиус во следниот напад имаше шанса за 2:0, но ако тој не погоди, во продолжение Мбапе беше на вистинското место.

Соиграчите од Реал навистина го бараа Килијан на денешниот меч, но најдобро успеа да го пронајде Белингам во 68-та минута. Со овој гол, стана јасно дека Реал освојува нов европски трофеј, а тоа е вкупно шести во Суперкупот на УЕФА.