Мбапе ќе профитира од отсуството на Винисиус, Реал без половина тим ќе брка победа на „Енфилд“

Реал Мадрид мора да брка позитивен резултат на гостувањето кај Ливерпул во Лигата на шампионите, а тренерот Карло Анчелоти мора да ја изведе оваа „операција“ без помош на многу важни фудбалери.

Повредите го преполовија стартниот тим на Реал, па Италијанецот мора да импровизира на неколку позиции, а единствен фудбалер кој ќе профитира е Килијан Мбапе.

„Марка“ најави дека Мбапе ќе добие можност да игра на природната позиција по левата страна во нападот, најмногу поради фактот што Винисиус е повреден и ќе го пропушти гостувањето на „Енфилд“.

Покрај Винисиус, во нападот опција не е ни Родриго, па Анчелоти ќе треба да избере меѓу неколку играчи, додека во средниот ред ќе го нема Орелијан Чуамени.

Од претходно е јасно дека во комбинација не се Милитао, Алаба и Карвахал, па во одбраната ќе помагаат Лукас Васкез и младиот Фран Асенсио.

Реал мора да оди на победа ако сака да остане во комбинација за Топ 8 пласманот во ЛШ, затоа што досега има само две победи на четири натпревари.