Мбапе го издвои најважниот играч на Реал кој не добива доволно внимание од јавноста: Не се зборува многу за него…..

Карло Анчелоти направи мали промени за гостувањето на „Бутарке“ и реши да го игра Килијан Мбапе на левата крилна позиција во нападот, одлука која се покажа како доста добра за францускиот напаѓач.

Мбапе се запиша во листата на стрелците и беше избран за МВП на натпреварот од страна на Ла Лига, а ова доаѓа во најдобар можен период за Французинот по малата криза која ја имаше на голгетерски план.

Килијан остана две недели во Мадрид и напорно тренираше со младинците на Реал за да работи на формата, па по одличното издание против Леганес, не криеше дека добро му дошло да работи со помладите колеги.

– Ми дојде навистина многу добро да тренирам со момчињата од Кастилја. Ми беше добро што трчав напорно со нив, што трениравме заедно две недели. На теренот се виде дека сум во добра физичка кондиција, – изјави Мбапе, кој покрај тоа што зборуваше за добрата соработка со Винисиус Жуниор, реши да стави посебен акцент на фудбалерот кој се жртвува за тимот и кој може да игра на речиси секоја позиција.

– Имам одличен однос со Вини, но и со сите други играчи во соблекувалната. Што да се каже за Валверде? Тој е многу важен за тимот, можеби и најважен. Кога зборуваме за играчи, луѓето најчесто сакаат да зборуваат за оние кои се наоѓаат во прв план и не се зборува многу за Валверде. Сакам да кажам дека тој е многу важен играч за нас, навистина круцијален за нашата игра, – изјави Французинот за Феде кој вчера принудно играше како десен бек.