Мбапе: Бев блиску до Меси и знам дека ја промени својата игра за да остане на врвот

Килијан Мбапе вчера стигна до 300-от гол во својата кариера на само 24 години и само уште еднаш потврди за каква фудбалска класа станува збор, но францускиот капитен ги остава индивидуалните признанија во втор план.

Франција вчера оствари историска победа над Гибралтар и го урна сопствениот рекорд со триумфот од 14:0, па Мбапе вели дека тимот за него секогаш е на прво место.

– 300 постигнати гола? Тоа за мене е во втор план, на прво место секогаш е тимот. Јас отсекогаш сум сакал да оставам свој белег во историјата на овој спорт, но има играчи кои постигнале по 800 и 850 гола. 300 голови се чисто лудило, но тимот за мене секогаш ќе биде поважен од индивидуалните рекорди, – изјави Мбапе, кој во последно време добива сугестии и препораки дека мора да еволуира во играта и повеќе да помага во одбрана.

– Знам дека секогаш може подобро, дури и најдобрите играчи во историјата мораа да менуваат работи. Јас играв со Меси и тој ја промени играта кога дојде во ПСЖ. Не беше оној истиот од Барселона. Тој во Париз го промени стилот на игра и тоа му дозволи да продолжи да остварува успеси, – вели Килијан, кој нема ништо против забелешките кои ги доби од Луис Енрике пред една недела.

– Моите соиграчи и моите тренери секогаш барале повеќе од мене. Среќен сум што очекувањата се големи, бидејќи јас сакам да продолжам да растам и да бележам прогрес, – завршува Мбапе.