Матијашевиќ вети: Македонија повторно ќе игра на ЕП!

Македонската одбојкарска репрезентација ги заврши подготовките и од утре ги започнува квалификациите за пласман на  Европското првенство кое ќе се одржи годинава во Полска, Чешка, Естонија и Финска.

Пред нас се битки против Босна и Херцеговина и Турција во Скопје, а селекторот Никола Матијашевиќ е оптимист и верува дека нашиот национален тим ќе се избори за второ учество во низа на големите турнири по она во 2019 година.

–Наша предност евидентно е што Федерацијата успеа да изменаџира да ги добие двата турнира овде, што зборува за нејзината способност, а нам ни дава уште поголема шанса. Проблем е што нема да има публика, па таа предност на домашен терен нема да биде толку голема, но сепак постои и јас верувам дека повторно ќе играме на европско првенство, -вели Матијашевиќ и додава:

–Се разбира дека сите сакаме да бидеме први, односно да ја победиме Турција еднаш, ако може и двапати. Тие имаат предност на позиции кај двајца или тројца одбојкари коишто се искусни и долго време играат на европските првенства. Да не влегувам во детали, тие на некој начин ни се должни од Љубљана. Според мене, главна и основна задача е да се квалификуваме, дали како први или како втори, не е толку важно. Би било идеално да сме први и на 16-ти навечер по натпреварот со Турција, да знаеме дека сме квалификувани, да можеме да планираме, да се организираме, а не да чекаме, -заклучува селекторот.

Со БиХ ќе играме утре и четврток, а со Турција во среда и сабота. Сте средби ќе се играат во СЦ „Борис Трајковски“.