Матеус му реплицираше на Хаман за случајот „Мусиала“

Дитмар Хаман предизвика многу реакции, па и го налути раководството на Баерн Минхен со коментарите за Џамал Мусиала, а реплика за неговиот контроверзен став стигна и од Лотар Матеус.

Хаман смета дека Мусила е многу себичен фудбалер, претерува со дриблинзите и потенцирал дека без размислување би го разменил за Флоријан Вирц од Баер Леверкузен, нешто што според „Билд“ предизвикало многу жестоки реакции кај менаџментот на Баварците.

Матеус не се сложува со помладиот колега.

– Хаман често сака да ја разбранува јавноста со своите ставови, но мислам дека не е во право за Мусиала.

– Ако треба да дрибла и да оди еден на еден, го прави тоа, но секогаш ги проигрува слободните соиграчи. Видете го примерот со голот на Филкруг против Унгарија, Мусиала можеше сам да ја заврши работата.

– Тој воопшто не е себичен, игра висок пресинг и ги проигрува соиграчите кога има опција за такво нешто. Поради сето ова, нормално е да добие слобода да дрибла кога ќе процени дека е потребно такво нешто, – вели Матеус.