Мартинез за „Златната топка“: Родри ја доби затоа што повеќе ја заслужува од Винисиус

Најпрестижната награда во светот на фудбалот „Златната топка“ е признание за најдобриот во една календарска година, признание кое секогаш знае да донесе реакции, коментари за тоа кој ја освоил, дали ја заслужил…ситуација која се повтори и сега кога истата заврши во рацете на асот на Манчестер Сити, Родри.

Шпанскиот репрезентативец беше во најтесниот круг заедно со играчите на Реал Мадрид Винисиус Жуниор, Џуд Белингам и Дани Карвахал со тоа што во јавноста некое време имаше мислење дека Бразилецот е фаворит и дека ќе дојде до трофејот кој го доделува „Франс Фудбал“.

На крајот Родри ја „грабна“ Златната топка, мислењата се поделени, а еден од оние кој верува дека наградата завршила на вистнско место е дефанзивецот Ињиго Мартинез.

-На крајот, секој има свој начин на размислување. Има 100 новинари кои гласаат и ако гласале за Родри тоа е затоа што веруваат дека ја заслужил повеќе од Винисиус. Среќен сум за Родри, го познавам и вистината е дека тоа што го видов таму со Златна топка ме направи среќен. Се надевам дека ќе продолжам да го гледам таму горе уште многу години, -вели дефанзивецот на Барса кој се надева дека еден ден и Ламин Јамал ќе биде победник во оваа категорија.