Мартинез испиша историја во Интер, па порача: Ова не можев да го замислам…

Интер го совлада Феенорд со 2-0 и се приближи до пласман во четвртфиналето на Лигата на шампионите.

Калчолигашот даде по еден гол во двете полувремиња, во првото реализираше Маркус Тирам, додека во второто погоди Лаутаро Мартинез.

Токму за капитенот ова беше специјален момент затоа што дојде до 18. гол во елитното натпреварување со што стана најдобар стрелец на Интер во оваа конкуренција. Тој го надмина легендарниот Сандро Мацола, а по оваа испишана историја порача дека може да се види како член на „нероаѕурите“ до крајот на кариерата.

-Толку сум горд, не можев да го замислам ова. Работев толку напорно и оние што ме познаваат добро знаат низ сето она што го поминав, но не завршува тука, јас сакам повеќе. Со задоволство би играл за Интер цела кариера, иако очигледно тоа зависи од многу фактори. Многу сум среќен овде, го обновив договорот во текот на летото, одлучувајќи да останам.

-Секое утро се будам со желба да излезам на теренот за тренинг. И моето семејство е среќно овде, -порача Аргентинецот кој има договор со актуелниот италијански првак до 30 јуни 2029 година.