Марсело со најискрена изјава по освоената титула со Флуминенсе: Во Реал Мадрид ќе ме разберат…

Флуминенсе испиша нова историја во јужноамериканскиот фудбал и за првпат од своето постоење ја освои најпрестижната титула на клупско ниво, односно славеше во завршниот натпревар на Копа Либертадорес.

Бразилскиот тим предводен од тренерот Диниз направи огромен успех и во големото финале на „Маракана“ заслужено ја совлада Бока Јуниорс со 2:1, триумф кој донесе илјадници солзи радосници на трибините, но и долу на теренот.

Еден од нив беше и човекот кој освои се што може да се освои на европско ниво, а солзите на Марсело само покажаа што за него значи овој трофеј освоен со матичниот клуб.

Марсело се врати во Флуминенсе и го освои најпрестижниот трофеј во Јужна Америка, по што самиот призна дека ова е најслатката и најважна титула во неговата кариера, ставајќи го едно скалило над сите трофеи освоени со Реал Мадрид.

– Во Реал Мадрид ќе ме разберат. Ова е најважната титула во мојата кариера на клупско ниво. Флуминенсе е клубот во кој израснав и во кој се изградив.

– Реал Мадрид секогаш ќе биде во моето срце, но за Флуминенсе ми е тешко да зборувам, тешко ми е да ви кажам што чувствувам, – изјави емотивниот Марсело.