Марселино си најде нова работа во елитен шпански клуб (Фото)

Вилјареал веќе две децении  е дел од шпанската елита и достигна големи успеси и на европско ниво со Унаи Емери како тренер на првиот тим, а сега во таборот на „жолтата подморница“ пристигнува уште едно добро познато име.

Марселино Гарсија Торал има богато искуство во Примера и водеше многу важни екипи изминативе неколку години, од кои посебно се истакна Валенсија каде успеа да ја освои титулата во Копа дел Реј, победувајќи ја Барселона во големото финале.

Марселино оваа сезона ја почна во Марсеј и пристигна како големо засилување во текот на летото, но Шпанецот не ги преживеа турбуленциите на Велодром  и пребега од Франција откако ултрасите почнаа да им се закануваат на играчите и на членовите од стручниот штаб.

Неполни два месеци подоцна, Марселино се враќа во родната Шпанија, и тоа да го води проектот на Вилјареал кој почна навистина доста лошо оваа сезона.

Марселино ставил потпис до 2026-та година, а ова ќе биде негова втора авантура во Вилјареал по онаа во 2016-та година.