Марота: Нема да паднеме во стапицата на Лукаку

Ромелу Лукаку ја прекина врската со Интер откако клубот реши да ја повлече понудата која му ја достави, нешто што беше последица на одлуката на Белгиецот во исто време да преговара со Јувентус.

Водечките луѓе на Интер останаа разочарани од Белгиецот и изминатово лето во неколку наврати ја истакнаа својата резигнација, но во текот на оваа недела, со интересна изјава се јави и Лукаку.

Ромелу посочи дека јавноста ќе остане шокирана ако ја каже целата вистина која се случила во изминатите неколку месеци, па со тоа отвори сомнежи и кон искреноста на директорите на Интер.

Оваа негова изјава не остана незабележана во Италија, па денеска дојде ред да слушнеме коментар од Бепе Марота кој беше оној кој ја повлече понудата за Белгиецот.

– Го охрабрувам Лукаку да ја каже вистината, тој е слободен да каже што сака. Да бидам искрен, не верувам дека тоа што го кажа има врска со одлуката на тренерот да биде резерва во финалето во Лигата на шампиони. Нашата совест е чиста, создадената контроверза нема никаква логика. Нема да паднеме во стапицата на Лукаку, – изјави Марота.