Марота најави бомбастичен трансфер во Интер: Кога топ играчи како Пауло Дибала се слободни…

Спортскиот директор на Интер, Џузепе Марота, меѓу редови ги потврди шпекулациите лиферувани во италијанските медиуми изминативе денови.

На Апенините се зборуваше дека Пауло Дибала би можел да направи големо предавство и да му се одмазди на својот сегашен тим, Јувентус, со тоа што ќе се согласи по крајот на сезоната како слободен агент да направи трансфер во Интер.

Вакво нешто најави и самиот Марота кој е главен и одговорен за трансферите во актуелниот италијански шампион.

– Кога топ играчи како Пауло Дибала остануваат без договор за шест месеци, нормално е да направите обид да ги ангажирате, тоа е дел од трансфер пазарот, -изјави Марота за „Медиасет“.

Пауло Дибала веќе се имал договорено со управата на Јувентус за нов договор, но потоа првите луѓе на „старата дама“ неочекувано се повлекле од договореното и побарале од фудбалерот да си го заработи новиот договор на терен.

Тоа го налутило аргентинскиот фудбалер, кој како што стојат работите навистина може да реализира фудбалско предавство.