„Марка“ ги пренесе трите можни сценарија за пополнување на испразнетото место во Лигата на шампионите

Eден од најреномираните светски спортски медиуми, шпанска „Марка“ во своето денешно издание пренесе што ќе се случува во Лигата на шампионите по и дефинитивното исфрлање на Вардар од натпреварувањето.

Медиумот пренесува дека постојат три опции за пополнување на испразнетото место, а една од опциите би била добра за македонскиот ракомет.

Имено, првата варијанта е местото во Лигата на шампионите да му припадне на вицешампионот во Македонија, Еурофарм Пелистер, со што би се продолжил континуитетот на македонски претставници во најелитното европско  ракометно натпреварување.

Втората опција е, местото да го добие ППД Загреб како тим кој  е шампион на седмопласираната нација во ранкингот на ЕХФ, а тоа е токму Хрватска.

Третата опција е местото да го пополни друг тим кој ќе добие дополнителна „вајлд-карта“, нешто што најмногу се споменува во јавноста. Наводно од ЕХФ планираат местото на Вардар да го пополнат со тимот на Алборг.